樓市或現恐慌拋售
■何濼生認為，辣招會令樓價逐步下調。
【專家睇法】
新地平價賣天璽，觸發二手樓劈價潮。嶺南大學經濟學系主任何濼生表示：「發展商劈價，提供一個訊息畀二手業主，真係要劈喎！其實客觀情況係，你唔劈價，係賣唔出，一個比較大幅少少嘅劈價，二手業主會驚，會擔心係跌嘅開始，可能會觸發恐慌。」
何濼生：辣招陰乾樓市
他分析，辣招會慢慢陰乾樓價，業主一驚嘅時候，或觸發恐慌性拋售，好易會變成泡沫爆破。「恐慌唔係一次兩次，要累積，𠵱家未到呢個階段，如果辣招繼續，樓價會逐步潛（下調），就有機會出現上述情況。」
地產分析員王震宇就指出，辣招前，發展商銷售新盤仍有兩至四成的溢價，目前新地僅劈價一成多，仍有水位，未去到與二手樓睇齊，相信二手樓仍可企穩一段時間。
他不認為二手豪宅會受影響，因業主有實力，「賣咗後，擺係銀行（資金）要承受負利率，因為目前通脹率約4厘，而銀行利息得零點幾個巴仙，賣咗之後，變咗淨蝕4厘；兩年後，隨時變咗唔見十厘，呢條數其實好多人都計緊，結果就唔減價。真係減價嗰啲，可能因失業、有病或生意出現困難而急走。對於炒家，完全無影響，反而急於賣樓的用家就受到影響。」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange
